Jump to content

KN/Prabhupada 0242 - ನಮ್ಮನ್ನು ನಾಗರಿಕತೆಯ ಮೂಲ ಪ್ರಕ್ರಿಯೆಗೆ ಹಿಂತಿರುಗಿಸುವುದು ಅತ್ಯಂತ ಕಷ್ಟಕರ

From Vanipedia


Lecture on BG 2.3 -- London, August 4, 1973

ಪ್ರಭುಪಾದ: ನಿನ್ನೆಯಷ್ಟೇ ನಾವು ಓದುತ್ತಿದ್ದೆವು. ವೈವಸ್ವತ ಮನು ಕರ್ದಮ ಮುನಿಗಳ ಬಳಿಗೆ ಬಂದಾಗ, ಅವರು ಹೀಗೆ ಸ್ವಾಗತಿಸುತ್ತಿದ್ದಾರೆ, "ಮಹೋದಯರೇ, ನಿಮ್ಮ ಈ ಪ್ರವಾಸದ ಅರ್ಥ ನೀವು ಕೇವಲ...," ಅದನ್ನೇನೆನ್ನುತ್ತಾರೆ, ಪರಿಶೀಲಿಸುವುದೇ?

ಭಕ್ತ: ತಪಾಸಣೆ ಮಾಡುವುದು.

ಪ್ರಭುಪಾದ: ತಪಾಸಣೆ ಮಾಡುವುದು, ಹೌದು. ತಪಾಸಣೆ ಮಾಡುವುದು. "ನಿಮ್ಮ ಪ್ರವಾಸ ಎಂದರೆ ವರ್ಣಾಶ್ರಮವು, ಬ್ರಾಹ್ಮಣನು ನಿಜವಾಗಿಯೂ ಬ್ರಾಹ್ಮಣನಂತೆ ಕಾರ್ಯನಿರ್ವಹಿಸುತ್ತಿದ್ದಾನೆಯೇ, ಕ್ಷತ್ರಿಯನು ನಿಜವಾಗಿಯೂ ಕ್ಷತ್ರಿಯನಂತೆ ಕಾರ್ಯನಿರ್ವಹಿಸುತ್ತಿದ್ದಾನೆಯೇ ಎಂದು ತಪಾಸಣೆ ಮಾಡುವುದು." ಅದು ರಾಜನ ಪ್ರವಾಸ. ರಾಜನ ಪ್ರವಾಸ ಎಂದರೆ ರಾಜ್ಯದ ವೆಚ್ಚದಲ್ಲಿ ಎಲ್ಲೋ ಹೋಗಿ ಮರಳಿ ಬರುವ ವಿನೋದ ಪ್ರವಾಸವಲ್ಲ. ಇಲ್ಲ. ಅವರು... ಕೆಲವೊಮ್ಮೆ ರಾಜನು ರಹಸ್ಯ ವೇಷದಲ್ಲಿ ಈ ವರ್ಣಾಶ್ರಮ ಧರ್ಮವು ಪಾಲಿಸಲ್ಪಡುತ್ತಿದೆಯೇ, ಸರಿಯಾಗಿ ಆಚರಿಸಲ್ಪಡುತ್ತಿದೆಯೇ, ಯಾರಾದರೂ ಹಿಪ್ಪಿಗಳಂತೆ ಸುಮ್ಮನೆ ಸಮಯ ವ್ಯರ್ಥ ಮಾಡುತ್ತಿದ್ದಾರೆಯೇ ಎಂದು ನೋಡಲು ಹೋಗುತ್ತಿದ್ದನು. ಇಲ್ಲ, ಹಾಗೆ ಮಾಡಲು ಸಾಧ್ಯವಿಲ್ಲ. ಹಾಗೆ ಮಾಡಲು ಸಾಧ್ಯವಿಲ್ಲ. ಈಗ ನಿಮ್ಮ ಸರ್ಕಾರದಲ್ಲಿ ಯಾರೂ ನಿರುದ್ಯೋಗಿಯಾಗಿರಬಾರದು ಎಂದು ಕೆಲವು ತಪಾಸಣೆಗಳಿರುತ್ತವೆ, ಆದರೆ ನಿರುದ್ಯೋಗಿಗಳಿರುತ್ತಾರೆ. ಆದರೆ ಎಷ್ಟೋ ವಿಷಯಗಳನ್ನು ಪ್ರಾಯೋಗಿಕವಾಗಿ ತಪಾಸಣೆ ಮಾಡುವುದಿಲ್ಲ. ಆದರೆ ಪ್ರತಿಯೊಂದನ್ನೂ ನೋಡುವುದು ಸರ್ಕಾರದ ಕರ್ತವ್ಯ. ವರ್ಣಾಶ್ರಮಾಚಾರವತಾ, ಪ್ರತಿಯೊಬ್ಬರೂ ಬ್ರಾಹ್ಮಣನಂತೆ ಆಚರಿಸುತ್ತಿದ್ದಾರೆ. ಸುಮ್ಮನೆ ಸುಳ್ಳಾಗಿ ಬ್ರಾಹ್ಮಣನಾಗುವುದು, ಸುಳ್ಳಾಗಿ ಕ್ಷತ್ರಿಯನಾಗುವುದು — ಇಲ್ಲ. ನೀವು ಮಾಡಲೇಬೇಕು. ಆದುದರಿಂದ, ಇದು ರಾಜನ ಕರ್ತವ್ಯವಾಗಿತ್ತು, ಸರ್ಕಾರದ ಕರ್ತವ್ಯವಾಗಿತ್ತು. ಈಗ ಪ್ರತಿಯೊಂದೂ ತಲೆಕೆಳಗಾಗಿದೆ. ಯಾವುದಕ್ಕೂ ಪ್ರಾಯೋಗಿಕ ಮೌಲ್ಯವಿಲ್ಲ. ಆದುದರಿಂದಲೇ ಚೈತನ್ಯ ಮಹಾಪ್ರಭುಗಳು ಹೇಳಿದರು, ಕಲೌ...

ಹರೇರ್ ನಾಮ ಹರೇರ್ ನಾಮ
ಹರೇರ್ ನಾಮೈವ ಕೇವಲಮ್
ಕಲೌ ನಾಸ್ತ್ಯೇವ ನಾಸ್ತ್ಯೇವ ನಾಸ್ತ್ಯೇವ
ಗತಿರ್ ಅನ್ಯಥಾ
(ಚೈ.ಚ ಆದಿ 17.21)

ನಮ್ಮನ್ನು ನಾಗರಿಕತೆಯ ಮೂಲ ಪ್ರಕ್ರಿಯೆಗೆ ಹಿಂತಿರುಗಿಸುವುದು ಅತ್ಯಂತ ಕಷ್ಟಕರವಾಗಿದೆ.

ಒಬ್ಬ ವೈಷ್ಣವನಿಗೆ, ನಾನು ವಿವರಿಸುತ್ತಿದ್ದಂತೆ, ತ್ರಿ-ದಶ-ಪೂರ್ ಆಕಾಶ-ಪುಷ್ಪಾಯತೇ ದುರ್ದಾಂತೇಂದ್ರಿಯ-ಕಾಲ-ಸರ್ಪ-ಪಟಲೀ. ಆದುದರಿಂದ, ಇಂದ್ರಿಯಗಳನ್ನು ನಿಯಂತ್ರಿಸುವುದು ದುರ್ದಾಂತ. ದುರ್ದಾಂತ ಎಂದರೆ ಅತ್ಯಂತ ದುಸ್ಸಾಧ್ಯವಾದದ್ದು. ಇಂದ್ರಿಯಗಳನ್ನು ನಿಯಂತ್ರಿಸುವುದು ಅತ್ಯಂತ, ಅತ್ಯಂತ ಕಷ್ಟಕರ. ಆದುದರಿಂದಲೇ, ಯೋಗ ಪ್ರಕ್ರಿಯೆ, ಗೂಢ ಯೋಗ ಪ್ರಕ್ರಿಯೆಯು — ಇಂದ್ರಿಯಗಳನ್ನು ನಿಯಂತ್ರಿಸುವುದು ಹೇಗೆ ಎಂದು ಅಭ್ಯಾಸ ಮಾಡುವುದಕ್ಕಾಗಿ ಬಂದಿದೆ. ಆದರೆ ಒಬ್ಬ ಭಕ್ತನಿಗೆ... ಹೇಗೆಂದರೆ ನಾಲಿಗೆಯನ್ನು ಕೇವಲ ಹರೇ ಕೃಷ್ಣ ಮಂತ್ರವನ್ನು ಜಪಿಸುವ ಮತ್ತು ಕೇವಲ ಕೃಷ್ಣ ಪ್ರಸಾದವನ್ನು ಸ್ವೀಕರಿಸುವ ಕಾರ್ಯದಲ್ಲಿ ಮಾತ್ರ ತೊಡಗಿಸಿದರೆ, ಇಡೀ ಕಾರ್ಯವು ಮುಗಿಯಿತು, ಅವನೇ ಪರಿಪೂರ್ಣ ಯೋಗಿ. ಪರಿಪೂರ್ಣ ಯೋಗಿ. ಆದುದರಿಂದ, ಒಬ್ಬ ಭಕ್ತನಿಗೆ ಇಂದ್ರಿಯಗಳಿಂದ ಯಾವುದೇ ತೊಂದರೆಯಿಲ್ಲ, ಏಕೆಂದರೆ ಒಬ್ಬ ಭಕ್ತನಿಗೆ ಪ್ರತಿಯೊಂದು ಇಂದ್ರಿಯವನ್ನು ಭಗವಂತನ ಸೇವೆಯಲ್ಲಿ ಹೇಗೆ ತೊಡಗಿಸಬೇಕೆಂದು ತಿಳಿದಿರುತ್ತದೆ. ಹೃಷೀಕೇಣ ಹೃಷೀಕೇಶ-ಸೇವನಮ್ (ಚೈ.ಚ ಮಧ್ಯ 19.170). ಅದೇ ಭಕ್ತಿ. ಹೃಷೀಕ ಎಂದರೆ ಇಂದ್ರಿಯಗಳು. ಇಂದ್ರಿಯಗಳು ಕೇವಲ ಕೃಷ್ಣನ, ಅಂದರೆ ಹೃಷೀಕೇಶನ ಸೇವೆಯಲ್ಲಿ ಮಾತ್ರ ತೊಡಗಿದ್ದಾಗ, ಯೋಗ ಅಭ್ಯಾಸ ಮಾಡುವ ಅಗತ್ಯವೇ ಇರುವುದಿಲ್ಲ. ಅವು ಸ್ವಯಂಚಾಲಿತವಾಗಿ ಕೃಷ್ಣನ ಸೇವೆಯಲ್ಲಿ ಬಂಧಿಸಲ್ಪಡುತ್ತವೆ. ಅವುಗಳಿಗೆ ಬೇರೆ ಯಾವುದೇ ಕೆಲಸವಿರುವುದಿಲ್ಲ. ಅದೇ ಅತ್ಯುನ್ನತವಾದದ್ದು. ಆದುದರಿಂದಲೇ, ಕೃಷ್ಣನು ಹೇಳುತ್ತಾನೆ,

ಯೋಗಿನಾಮ್ ಅಪಿ ಸರ್ವೇಷಾಂ
ಮದ್-ಗತೇನಾಂತರಾತ್ಮನಾ
ಶ್ರದ್ಧಾವಾನ್ ಭಜತೇ ಯೋ ಮಾಂ
ಸ ಮೇ ಯುಕ್ತತಮೋ ಮತಃ
(ಭ.ಗೀ 6.47)

"ಸದಾ ನನ್ನನ್ನೇ ಚಿಂತಿಸುವವನೇ ಪ್ರಥಮ ದರ್ಜೆಯ ಯೋಗಿ." ಆದುದರಿಂದ ಈ ಹರೇ ಕೃಷ್ಣ ಮಂತ್ರ ಜಪವನ್ನು, ನಾವು ಕೇವಲ ಜಪಿಸಿ ಶ್ರವಣ ಮಾಡಿದರೆ, ನಾವೇ ಪ್ರಥಮ ದರ್ಜೆಯ ಯೋಗಿ. ಇವು ಪ್ರಕ್ರಿಯೆಗಳು. ಕೃಷ್ಣನು ಅರ್ಜುನನಿಗೆ ಹೇಳಿದನು, "ನೀನೇಕೆ ಮನಸ್ಸಿನ ಈ ದೌರ್ಬಲ್ಯದಲ್ಲಿ ಮುಳುಗುತ್ತಿದ್ದೀಯ? ನೀನು ನನ್ನ ರಕ್ಷಣೆಯಲ್ಲಿದ್ದೀಯ. ನಾನು ನಿನಗೆ ಯುದ್ಧ ಮಾಡಲು ಆಜ್ಞಾಪಿಸುತ್ತಿದ್ದೇನೆ. ನೀನೇಕೆ ನಿರಾಕರಿಸುತ್ತಿದ್ದೀಯ?" ಇದೇ ಇದರ ತಾತ್ಪರ್ಯ.

ನಿಮಗೆಲ್ಲರಿಗೂ ತುಂಬಾ ಧನ್ಯವಾದಗಳು.